به‌رجه‌سته‌بوونا بنه‌مایێن ڕیالیزما جادوویی د ئه‌فسانا ''مه‌مێ ئاڵان'' یا فۆلکلیدا
ڕیالیزما جادوویی شێوازه‌کێ نوی یێ نڤیسینێ د ئه‌ده‌بیاتا داستانییا هه‌ڤچه‌رخدایه کو ڕه‌گه‌زێن واقع و ئاشۆپێ تێکه‌لی هه‌ڤدوو دبن و خودان پێکهاته‌یه‌کا تایبه‌تییه کو ب ئه‌گه‌رێ ئاسۆیا به‌رفره‌ها ئه‌وێ، هنده‌ک ده‌مان خالێن هه‌ڤپشک ل گه‌ل ڕێباز و شێوازێن دیترێن ئه‌ده‌بیدا هه‌یه. سه‌ره‌ڕای ئه‌وێ چه‌ندێ کو گه‌له‌ک ژ ڤه‌کۆله‌ر و ڕه‌خنه‌گرێن هه‌ڤچه‌رخ ئه‌وێ وه‌کو شێواز و ڕێبازه‌کا نوو دهه‌ژمێرن، لێ ڕیالیزما جادوویی وه‌کو به‌شه‌ک یان جۆره‌ک ژ ڕێبازا ڕیالیزمێ دهێته ل قه‌له‌مدان و وه‌کو ڕێبازه‌کا سه‌ربه‌خۆیا ئه‌ده‌بی سه‌ره‌ده‌ری ل گه‌ل ناهێته‌کرن؛ چونکی خودان چارچووڤه‌کێ سه‌ربه‌خۆ و نوی نینه و پترییا بنه‌ما و تایبه‌تمه‌ندیێن ڕێبازا ڕیالیزمێ تێدا ڕه‌نگڤه‌دده‌ن، ئانکو بنیاتێ وێ یێ سه‌ره‌کی هه‌ر ڕێبازا ڕیالیزمێیه. فۆلکلۆر ب گشتی و داستان ب تایبه‌تی، ئێک ژ ئه‌وان که‌ره‌ستانه کو به‌ر بنه‌مایێن سه‌یر و سه‌مه‌ر، نه‌مانا سنوور و تێکه‌لبوونا ڕاستی و ئاشۆپێ، خه‌ون و کار و کریارێن نامۆ و سه‌ره‌نجڕاکێش، ڕویدانێن دویری عه‌قل و لۆژیکێ، د شیاندا هه‌یه ل دویڤ به‌رجه‌سته‌بوونا بنه‌ما و ڕه‌هه‌ندێن ڕیالیزما جادوویی بگه‌ڕین. هه‌ر ژ بۆ ئه‌ڤێ مه‌به‌ستێ ژی مه که‌ره‌ستێ ئه‌ڤێ ڤه‌کۆلینا خۆ ژ فۆلکلۆری وه‌رگرتییه، مه داستانا ''مه‌مێ ئاڵان'' هه‌لبژاتییه کانێ هه‌تا چ ڕاده ئه‌م دشێین به‌رجه‌سته‌بوونا بنه‌مایێن ڕیالیزما جادوویێ تێدا ل ژێر ناڤونیشانێ ''شڕۆڤه‌کرنا بنه‌مایێن ئه‌فسانێ د داستانا ''مه‌مێ ئاڵان'' یا فۆلکلۆریدا لدویڤ ڕیالیزما جادوویی'' ده‌ستنیشان بکه‌ین.
