عزەددین كورێ جەماعەى (694-767مش /1294-1365ز) نمووکەیەک ژ ناڤدارێن بنەمالا كورێ جەماعەی
ئەف ڤەكولینە هاتیە تەرخانكرن بو دانەنیاسینا بنەمالا (كورێ جەماعە)ى ب گشتى و (عزەددین كورێ جەماعە)ى وەك ئێك ژ مەزنە زانایێن ناڤدار یێن موسلمان ژبنەمالا ناڤهاتى ب تایبەتى. هەروەسا دیاركرن و شلوڤەكرنا بوچوونێن مێژوونڤێسان دەربارەى وان برێكەكا زانستیانە. ڤەكولین پێكهاتیە ژ دەرازینكێ ل گەل دوو به‌ندان. دەرازینك: هاتیە ترخانكرن بوێ ناساندنا بنەمالا (كورێ جەماعە)ى ب گشتى و دەستنیشانكرنا هندەك ژ زانا و ناڤدارێن بنەمالا ناڤهاتى. به‌ندێ ئێكێ: هاتیە تەرخانكرن بو ژیانناما كەسى یا (عزەددین كورێ جەماعە)ى. به‌ندێ دووێ: هاتیە تەرخانكرن بو ژیانناما زانستى یا (عزەددین كورێ جەماعە)ى. ڤەكولین گەهشتیە هندەك ئەنجامان، ژ هەمیان گرنگتر: بنەمالا كورێ جەماعەى ناڤدار بوونە ل دویڤ ژێدەرێن مێژوویى ژبەركو خزمەتەكا بەرچاڤ گەهاندیە جیهانا ئیسلامێ ب گشتى ب رێكا زانایێن ئەوێ بنەمالێ و بەرهەیێن وان، كو ب هزاران پەرتووك ل دویڤ خو هێلاینە. عزەددین كورێ جەماعەى ژ زانایێن ناڤدار یێن موسلمان دهێتە هژمارتن، وئەڤ چەندە ب بەلگە د ژێدەرێن مێژوویيدا هاتیە سەلماندن، ئەو شارەزایی چەند زانستێن ئایينى بوو، چەند پلە و ئەركێن ئايینى و كارگێرى برێڤە برینە ب شێوەكێ باش و دادپەروەرانە ، هەروەكى د ژێدەران دا باس لێ هاتیە كرن. ڤەكولین هاتیە ئەنجامدان ل دویڤ مەرجێن زانستى بو رێبازا ڤەكولینا مێژوویی.